د ښار جوړولو متخصصین د نوي کابل ښار د ماسټر پلان پر محور راټول شول
۱۴۴۷/۴/۲۶
د کور او ښار جوړولو وزارت د دقیقې ارزونې او په عملي ډګر د اسانتیاوو رامنځته کولو په موخه د نوي کابل ښار ماسټر پلان او ساختاري پلان د متخصصینو پر مېز کېښود.
په دې معلوماتي پرزنټېشن کې، د کور او ښار جوړولو محترم وزیر، الحاج مولوي نجیب الله حیات حقاني، د دغه وزارت مالي او اداري محترم مرستیال الحاج محمد ارسلاح خروټی، د مسکن، ودانیزو چارو او د برنامو محترم مرستیال مولوي ګل زرین صابر، د ښاري چارو محترم مرستیال شیخ مدارعلي کریمي بامیاني، د وزارت یو شمېر رئیسانو، د کابل پوهنتون او کابل پولیتخنیک پوهنتون محترمو استادانو، د کابل ښاروالۍ محترم مرستیال صدرالدین تاجک او یو شمېر نورو مسلکي کادرونو ګډون وکړ.
د وزارت اړوند مسلکي ټیم د نوي کابل ښار د ماسټر پلان او ساختاري پلان په تړاو د رامنځته شوو تغیراتو او توافقاتو په اړه معلومات وړاندې کړل او د ګډونوالو نظرونه پرې وغوښتل شول، چې هر اړخیز بحثونه پرې وشول، نظریات وړاندې شول او تجربې شریکې شوې.
د کور او ښار جوړولو وزارت محترم وزیر الحاج مولوي نجیب الله حیات حقاني وایي، له دې کار یې موخه دا وه، ترڅو د یاد ښار په تړاو هر ګام له بشپړ احتیاط او تدبیر سره واخیستل شي او په راتلونکي کې پلانونه له پېچلي وضعیت سره مخامخ نه شي.
غونډه د تفاهم، همغږۍ او متقابلې همکارۍ په فضا کې پای ته ورسېده، او ګډونوالو د ماسټر پلان او ساختاري پلان د مؤثر تطبیق لپاره خپل بشپړ ملاتړ او همکاري څرګنده کړه.
