په غزني کې د ښاري سرغړونو دمخنیوي په موخه څارنه تر سره شوه
۱۴۴۷/۴/۱
د کور او ښار جوړولو وزارت د ښاري سرغړونو د مخنیوي ریاست محترم رئیس مولوي عبدالمنان حقاني څرګندوي چې د دې ریاست اړوند تخنیکي ټیم د غزني ښار په بېلابېلو ساحو کې د ساختماني چارو له نږدې څارنه وکړه.
ښاغلي مولوي حقاني وویل، په دې لیدنو کې یو شمېر استوګنیز تعمیرونه وکتل شول، چې چارې یې د منظور شوې نقشې سره سم پرمخ روانې وې. همدارنګه په یوه تعمیر کې د نقشې خلاف پر پیک د خښتو دیوال جوړ شوی و، چې مسؤلینو ته لارښوونه وشوه دغه سرغړونکی جوړښت ژر تر ژره ونړوي او کار د منظور شوې نقشې مطابق پرمخ یوسي.
مولوي بدالمنان حقاني ټینګار وکړ چې د ښاري سرغړونو د مخنیوي ریاست به په دوامداره توګه د ښارونو د ساختماني چارو څارنه کوي او هېچا ته به اجازه ورنه کړي چې د نقشې خلاف ودانۍ جوړه کړي.
د کور او ښار جوړولو وزارت د ښاري سرغړونو د مخنیوي ریاست دنده لري چې د هېواد په کچه د ساختماني چارو څارنه وکړي، د ښارونو منظم جوړښت وساتي او د غیرقانوني ودانیو مخه ونیسي. دغه ریاست د خلکو د ښاري اسانتیاوو د خوندیتوب او د معیاري ودانیزو چارو د تضمین په موخه پرله پسې ګامونه پورته کوي.
