د کور او ښار جوړولو وزارت، یو ځل بیا هېوادوالو ته کاري زمینه برابروي
۱۴۴۷/۰۳/۳۰
کار خپل اهل ته سپارل؛ هغه څه دي چې په هره اداره کې پرې ټینګار کېږي، دا دی د کور او ښار جوړولو وزارت یې عملي کوي.
د کور او ښار جوړولو وزارت محترم وزیر الحاج مولوي نجیب الله حیات حقاني، هوډ لري چې د دغه وزارت لپاره اهل کسان په دندو وګماري، ترڅو د اسلامي نظام تر چتر لاندې افغانستان ته خدمت وکړي.
په همدې موخه، په کور او ښار جوړولو وزارت کې د خالي بستونو لپاره د وړ کسانو د پیدا کولو په پار له یو شمېر کسانو ازموینه واخیستل شوه.
د کار کوونکو چارو ریاست محترم رئیس مولوي عبدالولي ارکاني وایي، دغه ازموینه د (۶۳) بېلا بېلو بستونو لپاره واخیستل شوه، چې یو مشېر کسانو ورته ځانونه نوماند کړي وو، چې بریالي کسان به وروسته معلوم شي.
دغه ازموینه د ټاکل شوې کمیټې له لوري ترسره شوه، چې پر مهال یې د کور او ښار جوړولو وزارت محترم وزیر الحاج مولوي نجیب الله حیات حقاني او د دغه وزارت د ښاري چارو محترم مرستیال شیخ مدارعلي کریمي بامیاني هم حضور درلود.
د ازموینې ګډونوالو ته په خطاب کې محترم وزیر وویل، که هر ګډونوال کوم اعتراض لري، کولای شي په لیکلې بڼه خپله شکایت، غوښتنه او وړاندیز وړاندې کړي، چې د ټاکل شوې کمیټې لخوا به ورته بشپړه پاملرنه وشي.
نوموړي وویل، هڅه کوي چې حق حقدار ته وسپارل شي، چارې رڼې پر مخ لاړې شي او د نا انډولۍ مخنیوی وشي.
د کور او ښار جوړولو وزارت، د اصلاحاتو او روڼتیا د ټینګښت په موخه تل هڅه کوي، چې د بستونو لپاره وړ، متخصص او مسلکي کسان د ازادو سیالیو له لارې وګماري.
