په فراه کې د جنوبي کانال د دوو پلونو د جوړېدو چارې و څارل شوې
۱۴۴۷/۰۳/۲۵
د فراه ولایت د کور او ښار جوړولو ریاست محترم رئیس مولوي نصرالله استقلال وایي چې د دې ریاست اړوند تخنیکي ټیم د فراه پر جنوبي کانال د دوو پلونو د جوړولو پروژې څارنه وکړه.
ښاغلي مولوي استقلال وویل، د معارف او باختر په نوم یاد پلونه د دې لپاره جوړېږي چې د اورښتونو پر مهال د کرجي او صدیق خان کلي اوسېدونکي د سېلاب له خطره خوندي پاتې شي او همدارنګه د ترافیکي تګ راتګ ستونزې له منځه ولاړې شي.
مولوي نصرالله استقلال څرګنده کړه چې د کور او ښار جوړولو ریاست تخنیکي ټیم په دوامداره ډول د پروژې له چارو څارنه کوي، تر څو د اصولو او تخنیکي معیارونو سره سم پر وخت بشپړه شي.
د کور او ښار جوړولو وزارت په هېواد کې د عامه تاسیساتو، سړکونو او پلونو د جوړولو پروژې تر خپل نظارت لاندې عملي کوي، په فراه ولایت کې د دغو دوو پلونو جوړېدل نه یوازې د خلکو د خوندیتوب لپاره مهم دي، بلکې د سیمې د اقتصادي او ټولنیز ژوند په اسانتیا کې هم اغېزمن رول لري.
