میدان وردګ ولایت کې د کوچيانو ښارګوټي کې تخلفات په نښه شول
۱۴۴۷/۰۳/۲۳
د کور او ښار جوړولو وزارت، له ښاري تخلفاتو د مخنیوي ریاست محترم رئیس مولوي عبدالمنان حقاني وایي، د دې ریاست اړوند تخنیکي ټیم په میدان وردګو ولایت کې د کوچيانو له ښارګوټي څخه څارنه ترسره کړه.
ښاغلی مولوي حقاني وایي، د څارنې پر مهال څرګنده شوه چې په یاد ښارګوټي کې سرغړونې شوي دي او پلان په سمه توګه نه دی تطبیق شوی.
نوموړی وایي، تخنیکي ټیم یې ومونده چې، د ۱۲م نمبر کوډ په ساحه کې چې د تفریحي پارک او شنې ساحې لپاره ځانګړې شوې ده او همدارنګه د ۲۰م نمبر کوډ په ساحه کې چې د ښځینه ښاري سالون لپاره ځانګړې شوې وه؛ استوګنیزې نمرې شوې وې او ودانیزې چارې یې روانې کړې وې.
محترم مولوي عبدالمنان حقاني وایي، د یادو دواړو پلاني تخلفاتو مخنیوی وشو، د استوګنیزو ودانیو چارې وځنډول شوې او په تړاو یې مرتکبینو ته پوهاوی ورکړل شو.
د کور او ښار جوړولو وزارت د ښارونو د منظمې ودې او پراختیا، د عامه ساحو د ساتنې او د ښاري پلانونو د تطبیق په موخه د څارنې او نظارت بهیر دوامداره ساتي.
دغه وزارت په څو ځله څرګنده کړې، چې د ودانیزو چارو پر مهال د پلان تطبیق ته باید پاملرنه وشي، په ځانګړي ډول د تفریحي، شنو او ټولنیزو ساحو په سیمو کې هر ډول غیر قانوني ودانیز فعالیتونه به جدي ودرول شي او د ښاري پلانونو د پلي کېدو لپاره به زمینه برابروي.
