په ادارو کې د نظم، اصولو او د مراتبو لړۍ پر مراعاتولو ټینګار وشو
۱۴۴۷/۳/۱
د کور او ښار جوړولو وزارت، د مسکن، ودانیزو چارو او د برنامو د پراختیا معینیت اړوند ریاستونو د کاري فعالیتونو او لاسته راوړونو د ارزونې په دوام، دا ځل د پانګونې چارو د تنظیم او د عامه اسانتیاوو د پراختیا محترم ریاستونو خپل کاري راپورونه او فعالیتونه د معینیت محترم مقام ته وړاندې کړل.
دې موخې ته ځانګړو شویو جلا غونډو کې، چې د مسکن، ودانیزو چارو او د برنامو د پراختیا محترم مرستیال مولوي گلزرین صابر په مشرۍ، د یادو ریاستونو د رئیسانو، امرینو او کار کوونکو په حضور کې ترسره شوې، د کاري همغږۍ د پیاوړتیا او د مسؤلیت منلو د زیاتوالي په اړه بحثونه او نظریات شریک شول.
محترم مولوي ګل زرین صابر، د دغو غونډو موخه د چارو ارزونه وبلله او د کار کوونکو د ژمنتیا، ریښتینولي او د چارو پسې پر اهمیت یې ټینګار وکړ.
ښاغلي مرستیال همداراز، له کار کوونکو وغوښتل چې د اداري نظم، اصولو او د وظیفوي مراتبو پړاونه مراعات وکړي او جدي پاملرنه ورته وکړي.
په غونډه کې، د عامه اسانتیاوو د پراختیا ریاست محترم رئیس مولوي سمیعالحق محمدي او د پانګونې چارو د تنظیم ریاست محترم چارسمبالي ارشاد عمر شینواري، خپل راپورونه جلا جلا وړاندې کړل.
دوی د خپلو ریاستونو اړوند فعالیتونه او لاسته راوړنې بیان کړې، او ترڅنګ یې شته ستونزې، ننګونې او تشکیلاتي اړتیاوې هم مطرح کړې، چې په تړاو یې د معینیت له رهبرۍ د لا زیاتې پاملرنې او همکارۍ غوښتنه وکړه.
