د جوزجان په ولایت کې د مهاجرینو ښارګوټي د څښاک اوبو د رسولو پرېکړه وشوه
۱۴۴۷/۰۲/۲۴
د جوزجان ولایت د کور او ښار جوړولو ریاست محترم رئیس ملا عبدالله فیضان وایي، د دایمي اسکان او ځمکې وېش کمیټې تر مشرۍ لاندې غونډه ترسره شوه.
ښاغلي ملا فیضان ویل، په غونډه کې د کلیو پراختیا، کرنې او مالدارۍ، چاپېریال ساتنې، عامه ګټو، ښاروالۍ، اوبو رسونې، روغتیا، بېرته راستنېدونکو او مهاجرینو ریاستونو، د استخباراتو استازي، د کدستر آمریت او د اَکشنېټ مؤسسې استازي ګډون کړی و.
د نوموړي په خبره، غونډې پرېکړه وکړه چې د مهاجرینو او بېرته راستنېدونکو لپاره د جوړېدونکي ښارګوټي د څښاک اوبو اړتیاوې د موجودې ساحې د اوبو سرچینو له لارې د نل لیکې او کانالیزاسیون په سیسټم پوره شي.
د یادولو وړه ده، د څښاک پاکو اوبو ته لاسرسی د مهاجرینو ښارګوټو د بنسټیزو اړتیاوو څخه ګڼل کېږي چې د خلکو د استوګنې د اسانتیا لپاره حیاتي ارزښت لري.
