په نوي کابل ښار کې د تخلفاتو مخنیوي، بیت المال خوندیتوب او د پلان پر بشپړ تطبیق خبرې وشوې
۱۴۴۷/۲/۱۵
د کور او ښار جوړولو وزارت د محترم سرپرست وزیر الحاج مولوي نجیب الله حیات حقاني په مشرۍ ، او د مالي او اداري محترم مرستیال الحاج محمد ارسلاح خروټي، د مسکن ودانیزو چارو او برنامو د پراختیا محترم مرستیال مولوي ګل زرین صابر، د صنایع سبز خصوصي شرکت محترم رئیس محمد محسن امیري او مل پلاوي، او دغه رزا د وزارت اړوندو رئیسانو او امرینو په ګډون او حضور غونډه وشوه.
د کور او ښار جوړولو وزارت محترم سرپرست وزیر الحاج مولوي نجیب الله حیات حقاني وویل، موخه دا ده، چې په نوي کابل ښار کې د سرغړونو مخنیوی وشي، بیت المال خوندي شي او په ټوله کې د دغه ښار او په ځانګړې توګه د صنایع سبز صنعتي ښارګوټي برخلیک معلوم شي.
ښاغلي سرپرست وزیر وویل، غواړي په صنایع سبز صنعتي ښارګوټي کې د پانګوالو او امارت اړوند شته ستونزې حل کړي او د شوي قرارداد له مخې مخکې لاړ شي.
تر هر اړخیزو اسنادو کتلو او دلایلو اورېدلو وروسته محترم وزیر پرېکړه وکړه، چې په صنایع سبز صنعتي ښارګوټي کې نوې چارې په کلکه بندي شي، تر څو یوې هوکړې ته رسېږي.
ښاغلي مولوي نجیب الله حقاني وویل، وزارت به پلان ترتیبوي او مقابل لوري ته به یې سپاري، چې هغوی یې پر تطبیق مکلف دي.
دغه راز، محترم حقاني په غونډه کې، د صنایع سبز شرکت ته چې د یاد صنعتي ښارګوټي مشري او مسؤلیت په غاړه لري، دنده وسپارله، څو عمومي سړک پوخ او زیربنایي ټولګټې چارې چې مسؤلیت یې دی، سرته ورسوي.
د ځمکو د خرڅلاو له درکه راټولې شوې د بیت المال پیسې باید د وزارت لوري ته وسپارل شي او له خپلسریو په کلکه ډډه وشي.
سرپرست وزیر، د وزارت له اړوندو تخنیکي ریاستونو څخه یو ګډ هیئت برابر کړ، چې موجوده پلان به په ساحه کې تطبیقوي، ستونزې او نیمګړتیاوې به په ګوته کوي او د اصلاح په موخه به حل لارې وړاندیز کوي، چې له مخې به یې د حل او راتلونکو اقداماتو په موخه پرېکړه وشي.
پورته موارد د طرفینو په خوښه بیان شول، چې په ترسره کولو کې به یې درېغ نه کېږي.
