ارزګان ولایت کې د ښاري تخلفاتو د مخنیوي په موخه عامه پوهاوی ترسره شو
۱۴۴۷/۲/۱۳
د کور او ښار جوړولو وزارت، له ښاري تخلفاتو د مخنیوي ریاست محترم رئیس مولوي عبدالمنان حقاني وایي، د ریاست اړوند تخنیکي او مسلکي ټیم یې د ارزګان ولایت په مرکز ترینکوټ ښار کې، عامه پوهاوی ترسره کړ.
ښاغلی مولوي حقاني وایي، دغه پوهاوی په ښارونو کې د ښاري نظم ساتلو او د خپلسریو مخنیوی په موخه و، چې په تړاو یې د ترینکوټ ښار په ټولو ناحیو کې پوهاوی ترسره شو.
نوموړی وایي، دغه چاره په ترینکوټ کې د کور او ښار جوړولو ریاست محترم رئیس ملا روح الله ابو احمد په هدایت او همکارۍ ترسره شوه.
د ښاري تخلفاتو څخه د مخنیوي ریاست څخه په رالېږل شوو معلوماتو کې راغلي چې، دوی په ښار کې کومه ښاري سرغړونه ونه لیده، خو په راتلونکي کې یې د ترسره کېدو مخنیوي په پار خلکو ته عامه پوهاوی ورکړ.
په دغه پوهاوی کې، خلکو ته ښودل کېږي، چې څنګه وکولای شي، خپل کورونه، مارکېټونه، هټۍ او نورې ودانیزې چارې د کور او ښار جوړولو وزارت د طرزالعمل مطابق جوړ کړي.
د کور او ښار جوړولو وزارت هڅې پیل کړي، چې ښارونه په معیارونو برابر او له ګډوډیو مخنیوی وکړي.
