د کندهار استئناف څارنوالۍ د ودانۍ د ساختماني چارو څخه څارنه وشوه
۱۴۴۷/۱/۲۷
د کندهار ولایت کور او ښار جوړولو ریاست محترم رئیس مولوي عبدالممتین سعید وایی، د دې ریاست اړوند تخنیکي ټيم په عینومېنه سیمه کې د استئناف څارنوالۍ د ودانۍ له روانو ساختماني چارو څخه څارنه وکړه.
ښاغلي مولوي سعید وویل، یاد تعمیر د دوهم او لومړي پوړ د خونې د فرش (سنګ مرمر) کارونه بشپړ شوي، د تشنابونو کاشي کاري ترسره شوې او د ودانۍ خارجي برخې پرایمر رنګمال شوي دي او همداراز، د سنګ مرمر د نصبولو چارې روانې دي.
د مولوي سعید په وینا، د څارنې پر مهال تخنیکي ټیم یو شمېر نیمګړتیاوې هم ثبت کړې؛ په ځانګړي ډول، د رنګمالۍ برخه کې د فیلینګ او ریګمال پروسه په ځینو برخو کې سم نه وه تطبیق شوې، سربېره پر دې، په ساحه کې د کاریګرو شمېر هم کم ښودل شوی.
د نوموړي په خبره، د قراردادي شرکت مسؤلینو ته سپارښتنه وشوه چې ټولې چارې باید د انجنیري نورمونو، نقشې، او قرارداد مطابق، په ټاکلي وخت کې بشپړې شي.
