د رحمان مېنې د تفصیلي پلان او امکانسنجي مطالعاتو په تړاو خبرې وشوې
۱۲/۱/۱۴۴۷
د کور او ښار جوړولو وزارت د مسکن، ودانیزو چارو او برنامو د پراختیا معینیت د وارسي کوونکي محترم انجنیر عبدالحمید آرین په مشرۍ غونډه ترسره شوه، چې موخه یې د کابل ښار د اتمې ناحیې اړوند د «رحمان مېنه» د استوګنې پروژې د تفصیلي پلان جوړولو او امکان سنجي مطالعاتو په اړه بحث او همغږي وه.
په دې غونډه کې چې د اړوندو ریاستونو رئیسانو او آمرینو ګډون درلود، محترم آرین څرګنده کړه چې د ښار د تفصیلي پلان ځانګړې کمیسیون له خوا د رحمان مېنې د پروژې د پلان تر تصویب هم مهاله، باید د امکان سنجي لازم چمتووالی هم ونیول شي.
هغه ټینګار وکړ چې دا مطالعات باید د ټولنیز وضعیت، چاپېریالي اغېزو، برېښنا، اوبو، او فاضلابو په برخو کې ترسره شي.
محترم آرین دا هم روښانه کړه چې د پروګرامونو د انسجام ریاست او د مسکن د انکشاف ریاست باید خپل لازم چمتووالی ولري، څو یاد فعالیتونه په ښه توګه سره همغږي او مخته یوسي.
د غونډې په دوام ، د حاضر ریاستونو مسؤلینو د تر سره شوو فعالیتونو او د تفصیلي پلان د ترتیب په ګډون، د نورو اړوندو مسایلو په اړه خپلې نظریې له ګډونوالو سره شریکې کړې.
د یادولو ده، چې د مسکن د وجهي صندوق آمر هم په دې ناسته کې ګډون کړی و، او د یادې پروژې د ملکیتي اسنادو د برابرولو اړوند یې خپل نظرونه وړاندې کړل او له اړوندو ریاستونو څخه یې د جدي پاملرنې غوښتنه وکړه.
