په سرپل ولایت کې د سلطان ابراهیم درې د استنادي دیوال د پروژې له چارو څارنه وشوه
۱۴۴۷/۰۱/۰۶
د سرپل ولایت د کور او ښار جوړولو ریاست محترم رئیس داملا محمد نور نوراني وایي، د دې ریاست اړوند تخنیکي ټیم لخوا د طبیعي پېښو سره د مبارزې ریاست د وړاندیز پر بنسټ، د سلطان ابراهیم درې د استنادي دیوال د کار د پیل له بهیره نظارت وکړ.
ښاغلي ملا نوراني وویل د تخنیکي معایناتو پر بنسټ څرګنده شوه، چې د باراني فصلونو پر مهال د درنو اوبو جريان او پرله پسې سېلابونو له امله د سیند بستر او د سړک غاړې په درېیو مهمو نقطو کې شدید تخریب رامنځته شوی، چې د خلکو ژوند او د وسایطو تګ راتګ یې له جدي ګواښ سره مخ کړی و.
د تخریب د لا پراخېدو د مخنیوي لپاره، پریکړه وشوه چې په یاده دره کې ۷۵ متره اوږد استنادي دیوال جوړ شي، ترڅو د سیند بستر او سړک غاړه له لا زیاتو زیانونو وژغوري.
الحاج ملا محمد نور نوراني، د سرپل ولایت د کور او ښار جوړولو رئیس، وویل چې یاده پروژه د خلکو د خوندیتوب، ترانسپورتي اسانتیاوو، او د طبیعي افتونو پر وړاندې د دوامدارو حللارو یوه مهمه برخه ده.
