د ترسره شوو او تر کار لاندې پروژو په تړاو خبرې وشوې
۱۴۴۷/۰۱/۰۶
د کور او ښار جوړولو وزارت، د مسکن، ودانیزو چارو او د برنامو د پراختیا معینیت اړوند ریاستونو د ترسره شوو او تر کار لاندې پروژو په تړاو ناسته وکړه.
دغه ناسته چې د یاد معینیت محترم چارسمبالي انجنیر عبدالحمید ارین په مشرۍ ترسره شوه، په کې د بېلا بېلو ریاستونو رئیسانو او استازو برخه اخیستې وه.
په ناسته کې، ښاغلي انجنیر عبدالحمید ارین، د چارو د باکیفیته او پر وخت ترسره کېدو باندې ټینګار وکړ او زیاته یې کړه، چې د وزارت په رهبرۍ کې د وروستي بدلون په پام کې نیولو سره، اړینه ده چې د فعالیتونو، لاسته راوړنو او وړاندیزونو یو جامع راپور چمتو او د وزارت له محترم مقام سره شریک شي.
نوموړي یو ځل بیا ټینګار وکړ، چې ټول ریاستونه اړ دي، چې ژر تر ژره خپلې لاسته راوړنې، روانې پروژې او اوسني پروګرامونه راټول او په یوه واحد او منسجم ډول یې ترتیب کړي.
په ناسته کې، راغلو رئیسانو او امرینو په نوبت سره د خپلو لاسته راوړنو او کاري پروژو په اړه خبرې وکړې او ډاډ یې ورکړ، چې د یو جامع راپور د چمتو کولو او یو ځای کولو په برخه کې به لازمه همکاري وکړي.
