د هلمند ولایت په واشېر ولسوالۍ کې د کډوالو لپاره نوی ښارګوټی پرانیستل شو
۱۴۴۶/۱۲/۶
د کور او ښار جوړولو وزارت د هلمند ولایت په واشېر ولسوالۍ کې د ۵۰۰۰ جریبه ځمکې په مساحت د کډوالو لپاره یو نوی ښارګوټی چې ۴۲۶۰ نمرې لري، په رسمي ډول پرانیست.
په دې غونډه کې د ریاسة الوزرا محترم اداري مرستیال مولوي عبدالسلام حنفي وویل، د ګاونډیو هېوادونو لخوا د مهاجرو اجباري را اېستل د ټولو اصولو خلاف دي.
ښاغلي حنفي وویل، د کډوالو ټول خدمات په ښه توګه ترسره کېږي او په خبره یې هغه مهاجرین چې مستحق وپېژندل شي، یوه نمره ځمکه ورکول کېږي.
د کور او ښار جوړولو وزارت محترم سرپرست وزیر الحاج شیخ حمدالله نعماني وایي، دغه ښارګوټی د کور او ښار جوړولو وزارت د ټولو معياري اصولو او پلانونو سره سم جوړ شو.
محترم سرپرست وزیر شيخ حمدالله نعماني په دې مراسمو کې وویل، کډوال هغه کسان دي چې د خپل دین، عزت، او ناموس د ساتنې په خاطر یې له خپل هېواد هجرت وکړ.
ښاغلي نعماني له ولسونو وغوښتل چې د خپلو مهاجرو وروڼو لپاره غېږه خلاصه کړي او هغوی وهڅوي چې خپل هېواد ته راستانه شي.
