د امارتي شرکتونو خپلواکې ادارې د دوه ودانیو په اړه خبرې وشوې
۱۴۴۶/۱۲/۱۳
د کور او ښار جوړولو وزارت محترم مالي او اداري مرستیال الحاج محمد ارسلاح خروټي، په خپل کاري دفتر کې د امارتي شرکتونو خپلواکې ادارې له محترم اداري رئیس مولوي محمد بصیر ادبیار او د ملي پراختیا شرکت محترم استازي عبدالمنیب یاسر سره وکتل.
په دغه کتنه کې د کابل نهمې ناحیې اړوند سیمه کې د بنایي او افغني دستګاه د ودانیو په اړه خبرې وشوې.
یادې ودانۍ اوسمهال د کور او ښار جوړولو وزارت له دوه محترمو معینیتونو سره دي، چې کرایه یې ورکول کېږي.
د امارتي شرکتونو خپلواکه اداره غواړي چې د کور او ښار جوړولو وزارت دې په بنایي کې د دوی اړوند ودانۍ تخلیه کړي او ځان ته دې بل ځای وګوري.
د کور او ښار جوړولو وزارت محترم مالي او اداري مرستیال الحاج محمد ارسلاح خروټي وویل، اوسمهال وزارت خپله په کافي اندازه د ودانیو نشتون سره مخامخ دی او په دې لټه کې دی چې یو مناسب ځای پیدا او اړوند معینیت ور ولېږدوي.
ښاغلي مالي او اداري مرستیال وویل، موضوع به په راتلونکې رهبري ناسته کې مطرح کړي او په ګډه به یې په تړاو تصمیم ونیسي، ترڅو په دغه برخه کې د امیرالمؤمنین حفظه الله حکم پلي شي او د دواړو امارتي ادارو د کور او ښار جوړولو وزارت او د امارتي شرکتونو خپلواکې ادارې مکاني ستونزې حل شي.
