د کوراو ښار جوړولو وزارت سرپرست په افغانستان کې د ملګرو ملتونو د خدماتي پروژو برخې له رئیس سره وکتل

۱۴۴۶/۱۰/۲۴

د کور او ښار جوړولو وزارت محترم سرپرست وزیر الحاج شیخ حمدالله نعماني په خپل کاري دفتر کې په افغانستان کې د ملګرو ملتونو د خدماتي پروژو برخې له محترم رئیس نیک جي کازیانا سره وکتل او د پراختیایي پروژو په اړه یې خبرې وکړې.

ښاغلي شیخ حمدالله نعماني د یونپس (UNOPs) رئیس او ورسره پلاوي ته ښه راغلاست وویل او دواړو لوریو په هغه پروژو خبرې وکړې چې د تېرې شل کلنې دورې په مهال پیل او په هماغه دور کې یې بېرته چارې د بېلا بېلو دلایلو له امله په ټپه ودرېدې.

محترم نعماني وویل، لازمه ده چې په افغانستان کې د ملګرو ملتونو د خدماتي پروژو څانګه یا یونپس مرستندویه هېوادونو ته قناعت ورکړي، ترڅو په ټپه ولاړې پروژې چې ګټه یې عام ولس ته ده، چارې یې بېرته پیل او ګټې اخیستنې ته یې وسپاري.

په کتنه کې، د ملګرو ملتونو د پروژو څانګې مشر نیک جي کازیانا وویل، د کور او ښار جوړولو وزارت دې ورسره تړون د دوه نورو کلونو لپاره هم لاسلیک او زماني تمدید دې ورکړي، چې په خبره یې دوی تمه لري مرستندویه هېوادونه دغه په ټپه ولاړې پروژې پیل کړي.

ښاغلي سرپرست وزیر الحاج شیخ حمدالله نعماني وویل، له تېرو دوه کلونو راهیسې یې همداسې یو تړون له یونپس سره لاسلیک کړی، خو تر دې دمه یې کومه مثبته اغېزه ونه کړه.

نوموړي وویل، دا ځل به یاده موضوع په رهبري ناسته کې مطرح کړي او په ګډه به یې په اړه تصمیم ونیسي.

د یادولو وړ ده، چې جاپان هېواد نوي کابل ښار ته له پلچرخي سیمې څخه د څښاک اوبو رسولو یوه پروژه پیل کړې وه، چې هماغه مهال بېرته د بېلا بېلو دلایلو له امله په ټپه ودرېده او تر نن یې چارې نه دي پیل شوي.

د کور او ښار جوړولو وزارت هڅې کوي، چې د پلازمېنې کابل په ګډون ټولو ولایتونو کې په انډولیزه توګه پراختیایي پروژې پلي کړي، ترڅو د خلکو په ژوند کې مثبت تغیرات رامنځته شي.

وزارت شهرسازی و مسکن در تلاش است تا پروژه های انکشافی را در تمام ولایات به شمول کابل به صورت متوازن تطبیق کند تا تغییرات مثبت در زندگی مردم ایجاد شود.