سرپل ولایت کې د اجباري راستنېدونکو لپاره د ښارګوټي تفصیلي پلان جوړ شو
۱۴۴۶/۰۹/۲۰
د کور او ښار جوړولو وزارت د سروې او جي ای ایس رئیس او دغه راز د عملیاتي چارو کمېټې مشر محترم حافظ انجنیر محمد یوسف لطیف وایي، د کمېټې په ګډو هڅو یې سرپل ولایت کې د مهاجرینو د مېشت کېدو په موخه د ښارګوټي تفصیلي پلان بشپړ کړ.
ښاغلی حافظ انجنیر لطیف وایي، دغه تفصیلي پلان د سرپل ولایت په سید اباد ولسوالۍ کې د جوړېدونکي ښارګوټي لپاره دی.
نوموړی وایي، یاد تفصیلي پلان د (1247.5) جریبه ځمکې لپاره جوړ شو چې، (1053) استوګنیزې نمرې لري.
دغه راز نوموړی زیاتوي چې، یاد ښارګوټی به د (10530) کسانو د ژوند کولو لپاره چمتو شي.
د کور او ښار جوړولو وزارت هڅې کوي چې، د اجباري راستنېدونکو کډوالو د مېشت کېدو په موخه په هر ولایت کې مناسب ښارګوټي ډیزاین کړي.
