د ټولګټو پروژو د رامنځته کېدو په موخه کابل کې یو څلوېښت ساحې تر څېړنو لاندې دي
۱۴۴۶/۰۹/۱۸
د کور او ښار جوړولو وزارت د ښاري ملکیتونو ته د حقوقي باور ورکولو ریاست محترم رئیس مولوي رحیم الله صادقي وایي، د ریاست اړوند علمي او تخنیکي ټیم یې په کابل کې یو څلوېښت (۴۱) ساحې تر څېړنو لاندې نیولي دي.
ښاغلی مولوي صادقي وایي، دغه یو څلوېښت ساحې د عالیقدر امیرالمؤمنین حفظه الله د حکم پر اساس څېړل کېږي، تر څو په کې ټولګټو پروژو پلي کولو ته زمینه برابره شي.
نوموړی وایي، یادې ساحې به له حقوقي پلوه بشپړې کړي چې، تر دې دمه یې د (۱۲) هغو ځینې چارې بشپړې کړي او په پاتې نورو یې کار روان دی.
ښاغلی مولوي رحیم الله صادقي وایي، کله چې د یادو ساحو حقوقي ستونزې بشپړې شي، د نورو اقداماتو په موخه به تخنیکي ریاستونو ته ولېږدول شي چې، د پانګونې او ټولګټو پروژو د رامنځته کولو لپاره یې چارې پر مخ یوسي.
د کور او ښار جوړولو وزارت له امارتي ځمکو څخه د سالمې، اغېزمنې او ګټورې استفادې او مدیریت په موخه کار کوي او پلان ورته جوړوي.
