مالي او اداري مرستیال د مالي کال ختمېدو په موخه د ځینو چارو پر چټکتیا ټینګار وکړ
۱۴۴۶/۰۹/۰۸
د کور او ښار جوړولو وزارت محترم مالي او اداري مرستیال الحاج محمد ارسلاح خروټي د مالي کال ختمېدو په موخه د مالي او اداري چارو پر اغېزمنې چټکتیا ټینګار وکړ.
ښاغلي مرستیال محمد ارسلاح خروټي په داسې حال کې چې، د یو شمېر ریاستونو چارې یې له نږدې وکتلې ټینګار وکړ چې، ټول ریاستونه دې خپلې چارې په وخت او اغېزمنه توګه سرته ورسوي.
نوموړي په چارو او پروسو کې د لا زیات شفافیت په رامنځته کولو خبرې وکړې او له کار کوونکو یې وغوښتل چې، ستونزې په ګوته او د حل په موخه یې وړاندیز کړي.
پر ریاستونو له نږدې ګرځېدو او له حال یې د ځان خبرولو ترڅنګ یو شمېر رئیسانو محترم الحاج محمد ارسلاح خروټي ته د ترسره شوو چارو، نیمګړتیاو او چمتوالي په اړه معلومات ورکړل.
مالي او اداري مرستیال د ریاستونو چارې او پلانونه وستایل او د شته ستونزو د حل برخه کې یې تر ممکنه بریده د حل ډاډ ورکړ.
د کور او ښار جوړولو وزارت هڅې کوي چې، د مالي کال تر ختمېدو وړاندې خپلې مالي او تدارکاتي چارې په اغېزمنه توګه بشپړې کړي او د نوي مالي کال لپاره تابیا ونیسي.
