محترم مالي او اداري مرستیال د کرنې وزارت له استازي سره وکتل
۱۴۴۶/۰۸/۰۹
د کور او ښار جوړولو وزارت محترم مالي او اداري مرستیال الحاج محمد ارسلاح خروټي د کرنې، مالدارۍ او اوبو لګولو وزارت د پراختیایي صندوق له محترم عمومي رئیس مولوي عبدالغفور غفاري سره وکتل.
په دغه کتنه کې د کرنې وزارت د پراختیایي صندوق محترم عمومي رئیس مولوي عبدالغفور غفاري وویل، په پام کې لري چې د خپلو چارو د پر مخ وړلو او محترمو بزګرانو او نورو اړوندو کسانو ته د خدمت کولو په موخه یو ځانګړی تعمیر ولري.
نوموړي وویل، دمګړۍ دوی په یو کرایه ځای کې اوسېږي چې، وخت یې په تمامېدو دی او اړتیا ده چې خپل ملکیت ولري.
ښاغلي غفاري وویل، د همدې موخې لپاره یې د کابل په بادام باغ کې یوه ساحه په پام کې نیولې چې، ودانۍ په کې اباده کړي.
د غفاري په خبره، لازمه ده چې د کور او ښار جوړولو وزارت ورته یوه معیاري نقشه جوړه، ویزه او په اختیار کې ورکړي چې دوی یې د ودانولو چارې پیل کړي.
په دغه کتنه کې، د کور او ښار جوړولو وزارت محترم مالي او اداري مرستیال الحاج محمد ارسلاح خروټي اړوند ریاست ته دنده وسپارله چې، ژر تر ژره دې د کرنې وزارت پراختیایي صندوق د فعالیت لپاره یوه ځانګړې معیاري نقشه جوړه او په اختیار کې ورکړي.
د کور او ښار جوړولو وزارت ټولو دولتي او غیر دولتي ادارو او اشخاصو ته په معیار برابرې نقشې جوړوي، ویزه کوي یې او بیا یې د پلي کېدا لپاره ورته سپاري.
