د راتلونکي مالي کال لپاره د وړاندیز شوې بودیجې په ملاتړ ناسته وشوه

۱۴۴۶/۰۷/۲۹

د کور او ښار جوړولو وزارت د محترم مالي او اداري مرستیال الحاج محمد ارسلاح خروټي په مشرۍ د راتلونکي (1404) مالي کال لپاره د دغه وزارت له وړاندیز شوې بودیجې د ملاتړ په موخه ناسته وشوه.

ښاغلي مرستیال محمد ارسلاح خروټي وویل، د کور او ښار جوړولو وزارت درنو هېوادوالو ته د منظمې ښاري ودې او پراختیا تر څنګ، د سرپناه جوړولو، ښارونو او ښارګوټو، اقتصادي زونونو پراختیا، بېلا بېلو پلانونو، له پروژو څار، بېلا بېلې سروې، نوي کابل ښار کې د لومړۍ درجې بیخ بناء چارې ترسره کول او داسې نورو چارو کې خدمات وړاندې کوي.

نوموړی وایي، د راتلونکي کال لپاره د کور او ښار جوړولو وزارت زیات شمېر پراختیایي پروژې لري چې، اړتیا ده په کافي اندازه بودیجه ورته په پام کې ونیول شي.

هغه، له ټولو اړوندو ریاستونو وغوښتل چې د خپلو پروژو برخه کې له وړاندیز شوې بودیجې څخه د محترم مالي ریاست په همکارۍ او همغږۍ دفاع وکړي.

محترم محمد ارسلاح خروټي وویل، که راتلونکی (1404) کال د اړتیا وړ بودیجه په واک کې ورکړل شي، نو له مخې به یې هغه پروژې پلي کړي چې، ګټه یې عامو خلکو ته رسېږي، ملي عواید ورسره لوړېږي، خلکو ته د کار کولو زمینه برابرېږي او په ټوله کې اقتصادي څرخ په خوځښت راولي.

د کور او ښار جوړولو وزارت د اسلامي امارت له کلیدي وزارتونو څخه دی، چې حساب پرې کېږي او د انسان د ژوند لپاره مهم او ضروري خدمات وړاندې کوي.