سمنګان ولایت کې د یو سړک د غیر معیاري جوړېدو مخنیوی وشو
۱۴۴۶/۰۶/۱۶
سمنګان ولایت کې د کور او ښار جوړولو ریاست محترم رئیس مولوي محمد امین نوري وایي، د ایبک ښار کې یې د یوې پروژې له چارو څارنه کړې، چې د غیر معیاري چارو مخنیوی یې کړی دی.
ښاغلی مولوي نوري وایي، په یاد ښار کې د شهیدانو چوک شاوخوا کې د جوړېدونکي سړک له چارو یې د نورو اړوندو ادارو په ملتیا لیدنه او ارزونه وکړه، چې د قیر ټسټ یې منفي و.
نوموړی وایي، کله یې چې د قیر له څو بیلرونو څخه نمونه د ټسټ لپاره واخیسته، پایله یې په لابراتوار کې منفي راووته.
نوموړي زیاته کړه، د ایبک محترمې ښاروالۍ ته یې وړاندیز وکړ، چې د یاد سړک له غیر معیاري جوړېدو مخنیوی دې وکړي او د ټولګتو چارو محترم ریاست د تخنیکي ځانګړتیاوو او نورم مطابق دې قراردادي شرکت ته دې جدي خبر ورکړي، چې قیر معیاري کړي او مخکې له دې چې ورښتونه د سړک بنسټیزې چارې زیانمنې کړي، باید بشپړ او ګتې اخیستنې ته وسپارل شي.
د کور او ښار جوړولو وزارت د ټولو ادارو له پروژو څارنه کوي او د معیار خلاف چارو ته د پلي کېدو اجازه نه ورکوي.
