د خوست ولایت د ښار لپاره ماسټر پلان جوړېږي
۱۴۴۶/۴/۱۴
د کور او ښار جوړولو وزارت د محترم سرپرست وزیر الحاج شیخ حمدالله نعماني په لارښوونه، یو هئیت ته دنده و سپارل شوه، تر څو یاد ولایت ته سفر وکړي، ساحه له نږدې وګوري او د ښار لپاره نوی ماسټر پلان جوړ کړي.
د خوست ولایت د کور او ښار جوړولو ریاست محترم رئیس مولوي حضرت جمال صلاح وویل، له مرکز ورغلي هیئت سره په ګډه یې د خوست له ښار لیدنه وکړه، چې په ګډه به د ښار لپاره ماسټر پلان جوړ کړي.
ښاغلي مولوي صلاح وویل، د خوست لپاره به د راتلوونکو شل کالونو لپاره د ماسټر پلان په جوړېدو کار کوي.
نوموړي زیاته کړه، په ياد ماسټر پلان کې به د خوست ښار اړوند ټولې ښاري اسانتیاوې (سړکونه، ترانسپورټي ترمينلونه، هوايي ډګرونه، سوداګریزې ساحې، هستوګنیزې ساحې،کرنیزې ځمکې، ځنګلي ساحې او نورې ...) شاملې وي.
د کور او ښار جوړولو وزارت د ولایتونو لپاره د ماسټر پلان ترڅنګ تفصیلي او نور اړین پلانونه چمتو کوي او د پلي کېدا لپاره یې اړوندو ښاروالیو ته سپاري