د رحمان مېنې د ښارګوټي د پروژې د ستونزو په تړاو خبرې وشوې
4/4/1446
د کور او ښار جوړولو وزارت د مسکن، ودانیزو چارو او د برنامو د پراختیا محترم مرستیال الحاج محمد اسماعیل فائز د کابل ښار په اتمه ناحیه رحمان مېنه کې د هستوګنیزې پروژې له مسوولینو سره وکتل.
لومړی، د رحمان مېنې د ښارګوټي د پروژې مسؤلینو د یادې پروژې د ستونزو او د ودانیزو چارو د ځنډېدو لاملونو په تړاو معلومات وړاندې کړل.
دوی زیاته کړه، که څه هم په پوره ډاډ سره د یاد ښارګوټي ودانیزې چارې پیل شوې وې، خو په خبره یې وروسته د یو لړ حقوقي ستونزو له امله روانې چارې په ټپه ودرېدې .
د کور او ښار جوړولو وزارت د مسکن، ودانیزو چارو او د برنامو د پراختیا محترم مرستیال الحاج محمد اسماعیل فائز د یادې پروژې اړوندو مسؤلینو ته دنده وسپارله، تر څو د رحمن مینې د ښارګوټي ټول موضوعات په هر اړخیزه توګه وڅیړي او په راتلونکې ناسته کې دې یې وړاندې کړي، چې په تړاو یې پرېکړه وشي.
د کور او ښار جوړولو وزارت هڅې پیل کړي چې د نیمه کاره او په ټپه ولاړو پروژو ستونزې حل او ودانیزې چارې یې پېرته پیل کړي، چې ورسره به خلکو ته مناسبه سرپناه برابره او د کار کولو زمینه برابره شي.
