د کندهار څلور ولسوالیو لپاره تفصیلي پلانونه جوړ شول
۱۴۴۶/۰۱/۱۵
د کور او ښار جوړولو وزارت هڅې پیل کړي چې د هېواد په کچه ټولو ولایتونو او ولسوالیو کې د غیر پلاني او خپل سرې ودې او پراختیا مخنیوی وکړي.
د پورته ذکر شوې موخې ترلاسه کولو لپاره پلان دی چې د نویو بازارونو سروې او په هر ولایت کې د څو ولسوالیو لپاره ستراتېژیک / تفصیلي پلانونه جوړ شي.
د همدغې هڅې په لړ کې، دا دی د کندهار ولایت د څلورو ولسوالیو لپاره چې منظم تفصیلي پلانونه جوړ او تائید شول.
د کور او ښار جوړلو وزارت د ماسټر پلان او تفصیلي پلانونو محترم ریاست د کندهار (غورک، لوړ شاولي کوټ، ښکته شاولي کوټ، ښکته میوند) ولسوالیو لپاره تفصیلي پلانونه جوړ او د تائید په موخه رسماً لاسلیک شول چې په یاد ولایت کې به د کور او ښار جوړولو محترم ریاست ته وسپارل شي.
د کور او ښار جوړولو وزارت محترم سرپرست وزیر الحاج شیخ حمدالله نعماني وایي، د دې او دېته ورته پلانونو په جوړېدو سره به په بازارونو او ولسوالیو کې د غیر پلانې او خپل سرې ودې او پراختیا مخنیوی وشي.
ښاغلی شیخ حمدالله نعماني وایي، د دې پلانونو په تطبیق سره به د یادو ولسوالیو اوسېدونکي له منظمې ښاري ودې او پراختیا څخه برخمن شي او پانګوال به په ډاډه زړه پانګونه وکړي.
د کور او ښار جوړولو وزارت هڅې کوي چې تر ممکنه بریده په هېواد کې د غیرمنظمې، خپل سرې او غیر پلانې ودې او پراختیا مخنیوی وکړي او خلک له ښاري امتیازاتو برخمن کړي.
