لښکرګاه کې له څو بېلا بېلو ودانیزو پروژو څارنه وشوه
۱۴۴۵/۱۲/۱۸
هلمند ولایت کې د کور او ښار جوړولو ریاست محترم رئیس الحاج مولوي سید نېک محمد معتصم وایي، د ریاست اړوند انجنیرۍ او نظارت ټیم په ملتیا یې د لښکرګاه ښار کې د بُست روغتون د جدي مراقبت دوه پوړیزې ودانۍ او د مرکزي بند خونې د توقیف خونو او بُست تصدۍ شپږ پوړیزې ودانۍ له چارو څارنه وکړه.
ښاغلی مولوي معتصم وایي، د بُست روغتون د جدي مراقبت څانګې ودانیزې چارې بشپړېدو ته نږدې شوي، د مرکزي بند خونې (١٤٠) توقیف خونې دي، چې څلوېښت یی بشپړې شوي او پاتې نورو توقیف خونو باندې کار روان دی او دغه راز د بُست تصدۍ شپږ پوړیزه ودانۍ د ښار په منځ کې په مشارکتي ډول د یو خصوصی شرکت سره په ګډ تفاهم جوړېږي.
د نوموړي په خبره، د یادو ټولو پروژو څخه څارنه په دغه ولایت کې د کور او ښار جوړولو ریاست په غاړه ده.
هلمند کې د کور او ښار جوړولو ریاست د انجینرۍ ټیم د پروژو قرارداديانو او مسؤلینو ته لازمې لارښوونې کړي، تر څو چارې د قرارداد او پلان له مخې په معیاري او اصولي ډول ترسره کړي.
