د پنځم مکروریانو د ستونزو پر دایمي حل خبرې وشوې
۱۴۴۵/۰۷/۱۶
د کور او ښار جوړولو وزارت د محترم سرپرست وزیر شیخ حمدالله نعماني په مشرۍ د پنځم مکروریانو د ستونزو د حل کمېټې ناسته وکړه.
دغه ناسته د ا.ا.ا د محترمې کابینې د پرېکړې د تطبیق په موخه وشوه، چې په کې د اطلاعات او فرهنګ محترم وزارت، کرنې او مالدارۍ محترم وزارت، چاپېریال ساتنې محترمې ملي ادارې، کابل محترمې ښاروالۍ، اوبو رسولو محترم ملي شرکت او د کور او ښار جوړولو وزارت محترمو تخنیکي او حقوقي مشاورینو ګډون کړی وو.
په ناسته کې د پنځم مکروریانو د ستونزو پر دایمي حل هر اړخیزې خبرې وشوې او په پایله کې د کمېټې ګډونوالو لازم وګڼله چې د یادې پروژې د ستونزو دایمي حل او خلکو ته د قناعت ورکولو په موخه دې موضوع عدلي او قضایي ارګانونو ته ور وپېژندل شي.
د پنځم مکروریانو په تړاو ګمارل شوې کمېټه به د دغې ناستې راپور د ا.ا.ا محترمې کابینې ته وړاندې کوي چې په اړه یې د راتلونکو اقداماتو په موخه هغه څه چې لازم دي، ترسره کړي.
