د کور او ښار جوړولو سرپرست وزیر د اغا خان موسسې د مسکن د برخې له استازو سره وکتل
1444/06/18 د اغا خان موسسې د مسکن د برخې استازو د کور او ښار جوړولو د محترم سر پرست وزیر شیخ حمدالله نعماني سره د لیدو پر مهال د دې موسسې د مرستو، په خوست او پکتیکا کې د زلزله ځپلو سره د کورونو د جوړولو په اړه مالومات ور کړل. د دې موسسې استازو د کور او ښار جوړولو وزارت د همکارۍ نه مننه وکړه زیاته یې کړه چې په خوست او پکتیکا کې د زلزله ځپلو لپاره د دې موسسې لخوا دایمي کورونو او سړکونو په ترمیم کې عملي کارونه شروع شوي دي. د دې موسسې استازو وویل چې د کور او ښار جوړولو وزارت په مرسته خوست ولایت کې 300 بابه دایمي کورونه جوړوي چې 50 سلنه چارې یې مخته تللي دي. همدارنګه د اغا موسسې د مسکن د برخې استازو د کابل په دریمه ناحیه کې د ټولنیزو او اقصتادي مطالعاتو په اړه چې د متخصصینو لخوا مخته وړل کیږي هم معلومات ور کړل. د کور او ښار جوړولو محترم سرپرست وزیر د اغا خان بنسټ له هر اړخیزو همکاریو مننه وکړه زیاته یې کړه چې د کور او ښار جوړولو وزارت په خوست، پکتیکا او نورو ولایتونو کې د اغا خان بنسټ د پروژو له تطبیق ملاتړ کوي.
