یو ترکي خیریه شرکت په پېروزي استوګنیز ښارګوټي کې دارالایتام کمپلکس جوړوي
۱۴۴۴/۰۲/۲۱
د کور او ښار جوړولو وزارت په هڅو د کابل په (۱۹) مه ناحیه پېروزي استوګنیزه پروژه کې د شهیدانو ورثه وو لپاره یو دارالایتام کمپلکس جوړیږي.
د کور او ښار جوړولو وزارت له محترم سرپرست وزیر مولوي حمدالله نعماني سره په ناسته کې د (شبیر) په نوم د یوه ترکي خیریه شرکت مسؤلینو وویل، غواړي په کابل کې د یتیم پالنې په موخه یو مرکز جوړ کړي.
د یاد شرکت مسؤلین وایي، جوړېدونکی دارالایتام د شهیدانو ورثه وو لپاره جوړېږي، چې په کې به مسجد شریف، د حرفه یي زده کړو ځای، تدریسي تعمیر، لیلیه، روغتیایي کلینیک، د ماشومانو د لوبو ځای او نورې لازمې اسانتیاوي ولري.
دوی د کور او ښار جوړولو وزارت څخه وغوښتل چې د کابل ښار کې ورته په مناسب ځای کې شاوخوا (۲۰) شل جریبه ځمکه ورکړي، ترڅو په کې یاد کمپلکس جوړ کړي.
د کور او ښار جوړولو وزارت محترم سرپرست وزیر مولوي حمدالله نعماني وویل له هرهغه کورني او بهرني پانګوال ملاتړ او همکاري ورسره کوي چې غواړي افغانستان کې په بېلا بېلو برخو کې پانګونه وکړي او په وینای یې دوی به ورته هر اړخیزې اسانتیاوې برابرې کړي.
ښاغلي سرپرست وزیر د پیروزي ښارګوټي مسؤلینو ته سپارښتنه وکړه، چې د شبیر شرکت لپاره په پیروزي ښارګوټي کې د اړتیا وړ ځمکه ځانګړې کړي، چې ډېر ژر به یې عملي چارې هم پیل شي.
