د ښار جوړولو او ځمکو سرپرست وزیر په ننګرهار ولایت کې د نیمه کاره پاتې پروژو څخه لیدنه وکړه
۱۴۴۴/۲/۷
د ښار جوړولو او ځمکو محترم سرپرست وزیر مولوي حمدالله نعماني د یوه تخنیکي او مسلکي ټیم په ملتیا ننګرهار ولایت ته سفر وکړ او هلته یې په جلال اباد ښار کې د مکروریانو پروژې له نیمه کاره چارو چې په شاوخوا (۳۰۰) درې سوه جریبه ځمکه کې (۶۰) بلاکونه جوړېږي، په قاسم اباد کې د غالیو اوبدلو صنعتي او استوګنیزې پروژې او د استادانو استوګنیزې پروژې له وضعیت ارزونه وکړه.
په جلال اباد کې د مکروریانو پروژه په (۱۳۹۳) کال کې پیل شوې وه، چې د بېلا بېلو لاملونو له کبله یې چارې په ټپه درېدلي دي.
د ښار جوړولو او ځمکو وزارت محترم سرپرست وزیر مولوي حمدالله نعماني په مشرۍ تللي ټیم د یادو پروژو او هلته د شته نورو ټولګتو پروژو په اړه تخنیکي، مالي، حقوقي او ټولنیزه ارزونه وکړه او هغه لاملونه یې په ګوته کړل، چې له امله یې په ننګرهار کې شته ټولګټې پروژې په ټپه ولاړې دي.
ښاغلي وزیر مولوي حمدالله نعماني وویل، د یادو پروژو په بیا پیلېدو سره به لسګونه کسانو ته د کار کولو زمینه برابره شي، د بې سرپناه خلکو د سرپناه نشتون ستونزه به حل شي، د فقر کچه به راکمه شي او ورسره به هر اړخیزه وده او پیاوړتیا رامنځته شي.
نوموړي زیاته کړه، په ننګرهار کې خلک سرپناه ته اړتیا لري او د غالیو اوبدلو صنعتي او استوګنیز ښارګوټي په فعالیت سره به خصوصي سکتور هم وده وکړي.
دمګړۍ په ننګرهار ولایت کې (۳۶) ښارګوټي دي چې چارې یې تر ډېره رسېدلي، خو په ټپه ولاړې پاتې دي.
وزیر مولوي نعماني، د یادو پروژو اړوندو مسؤلینو ته لازمې لارښوونې وکړې او سپارښتنه یې وکړه چې د پروژو اړوندې ټولې لومړنۍ چارې دې ژر تر ژره حل او عملي کار ته دې چمتوالی ونیول شي.
