د کابل د نوي ښار د ماسټر پلان ارزونه وشوه
02/02/1444
په هغه غونډه کې چې د ښار جوړولو او ځمکو وزارت د سرپرست محترم مولوي حمدالله نعماني په مشرۍ او د وزارتونو، نهادونو او خپلواکو ادارو د استازو او د وزارت د کارپوهانو او انجنیرانو په ګډون جوړه شوې وه، د کابل نوي ښار د ماسټر پلان طرحه د اسلامي ټولنې او افغاني کلتور او عنعناتو د اړتیاوو په نظر کې نیولو سره وارزول شوه.
د ښار جوړولواو ځمکو وزارت محترم سرپرست مولوي حمدالله نعماني د دې غونډې موخه د کابل د نوي ښار د ماسټر پلان د ارزونې په اړه د ا.ا.ا د کابینې د (۱۰) ګڼې پرېکړه لیک بشپړول یاد کړل.
نوموړي په همدې موخه له ګډونوالو غوښتنه وکړه، چې په تړاو یې خپل نظرونه او وړاندیزونه څرګند کړي.
د ښار جوړولو او ځمکو وزارت انجنیرانو د کابل نوي ښار د ماسټر پلان تخنیکي موضوعاتو په اړه د وزارتونو او خپلواکو ادارو استازو ته معلومات ورکړل او د عامه اسانتیاوو د اصلاح وړاندیزونه یې په بېلا بېلو برخو کې وړاندې کړل.
د وزارتونو، خپلواکو ادارو او نهادونو استازو د کابل د نوي ښار د ماسټر پلان په اړه خپل نظرونه څرګند کړل او د ښار جوړولو او ځمکو وزارت د متخصصینو او انجنیرانو له لوري یې د دغه ماسټر پلان له چمتو کولو څخه مننه وکړه او ویې ویل چې دغه ماسټر پلان د اسلامي معیارونو په نظر کې نیولو سره چمتو شوی دی.
د دې غونډې په پای کې د کابل د نوي ښار په ماسټر پلان کې د اسلامي ټولنې او افغاني کلتور معیارونه تایید شول او څرګنده شوه چې د اړوندو څانګو په مشوره دې مفصل پلانونه جوړ شي.
