د ښار جوړولو او ځمکو وزارت سرپرست د یوناما دفتر د قانون حاکمیت برخې له رئیسې سره وکتل
۱۴۴۴/۰۱/۱۳
د ښار جوړولو او ځمکو وزارت محترم سرپرست وزیر مولوي حمدالله نعماني په کابل کې د یوناما دفتر د قانون حاکمیت برخې له رئیسې اغلې مونیکا مارتینز سره وکتل او د ښاري پلانونو د پلې کېدا پر څرنګوالي، د ځمکو استملاک او مهاجرینو او زلزله ځپلو ته د سرپناه جوړولو په اړه یې خبرې وکړې.
په کابل کې د یونما د قانون د حاکمیت د برخې ریسې د یادې ادارې د فعالیتونو په اړه وویل، چې د ښاري پلانونو په پلې کولو او د ځمکې چارو په تنظیم کې یې اساسي رول لوبولی دی.
اغلې مونیکا زیاته کړه، چې ادارې یې د ځمکو د حل او د افغانانو د حقوقو خوندیتوب په برخه کې ګټور کارونه کړي او په دې برخه کې غواړي چې د ښار جوړولو او ځمکو له وزارت سره همکاري وکړي.
د ښار جوړولو او ځمکو وزارت محترم سرپرست وزیر مولوي حمدالله نعماني په کابل کې د یونما د دفتر له همکاریو مننه وکړه او وې ویل، د ښار جوړولو او ځمکو وزارت د ځمکو په برخه کې ګټور کارونه ترسره کړي او د امارت په کچه قانون تصنیف شوی چې د ځمکو برخه کې به ټولو ستونزو ته پوره جواب ویونکی وي.
نوموړي زیاته کړه، چې د ا.ا.ا د مشرتابه لخوا د یاد قانون د توشیح کیدو وروسته به د ځمکو د برخې ټولو ستونزو ته رسیدنه وشي.
دغه راز د ښار جوړولو او ځمکو وزارت محترم سرپرست وزیر مولوي حمدالله نعماني وویل، په افغانستان کې د وروستیو اللهي افتونو او همدارنګه د ګاونډیو هېوادونو څخه د بېرته راستنېدونکو لپاره د سر پناه جوړولو په برخه کې د یونما او نورو مرستندویه هېوادونو همکارۍ ته اړتیا لري، تر څو د اړمنو کورنیو ستونزو ته رسیدنه وشي.
په کابل کې د یونما د قانون د حاکمیت د برخې مشرې په ټوله کې د ښار جوړولو او ځمکو وزارت له کړنو خوښي وښوده او ژمنه یې وکړه چې له وزارت سره به د بې سرپناه خلکو ته د سرپناه په برابرولو او د ځمکې خوندیتوب د قانون د عامه پوهاوي په برخه کې همکاري وکړي.
