مالي اسناد دې پر وخت او شفافه توګه اجراء شي
۱۴۴۳/۱۲/۲۶
د ښار جوړولو او ځمکو وزارت مالي ریاست د خپلو کړنو او فعالیتونو په تړاو د تیرې میاشتې کاري راپور د ښار جوړولو او ځمکو وزارت محترم مالي او اداري مرستیال حافظ محمد امین فاروقي ته وړاندې کړ.
په دغه د ارزونې ناسته کې محترم مالي او اداري مرستیال د مالي ریاست اړوند چارې، عواید او د بودیجې لګښت ارزونه وکړه.
د مالي ریاست مسؤلینو د عادي او پراختیایي بودیجې، معاشونو اجراء کولو، عوایدو، لګښتونو او حوالو په اړه وضاحت ورکړ.
ښاغلي مالي رییس محمد عارف عبرت یادونه وکړه چې د اړتیا له مخې دې د دې وزارت پراختیایي بودیجه په عادي بودیجه تبدیله شي.
نوموړي زیاته کړه چې د وزارت اړوند حوالې او پولي اجرأت تر پخوا منظم او شفاف شوي دي.
د ښار جوړولو او ځمکو وزارت محترم مالي او اداري مرستیال حافظ محمد امین فاروقي د مالي چارو د غوره پرمختګ او فعالیت په موخه د یاد ریاست مسؤلینو ته لازمې او ګټورې لارښوونې وکړې او زیاته یې کړه، چې مالي اسناد دې پر وخت او شفافه توګه اجراء شي.
