د ښار جوړولو او ځمکو وزارت دروازې د مراجعینو پر مخ پرانستې دي
۱۴۴۳/۱۰/۱۷
د ښار جوړولو او ځمکو وزارت سرپرست محترم مولوي حمد الله نعماني د ګڼ شمېر هغه هېوادوالو سره وکتل چې د بېلا بېلو چارو په موخه یاد وزارت ته راغلي وو.
ښاغلي مولوي حمد الله نعماني د یادو مراجعینو ستونزې او غوښتنې واورېدې او د حل په موخه یې لازمې او ګټورې لارښوونې وکړې.
ښاغلي نعماني مراجعینو ته په خطاب کې وویل؛ وزارت د ټولو افغانانو پورې اړوند دی او تل یې دروازې د خلکو پر مخ پرانستې دي، چې د خپلو ستونزو د حل او چارو پرمختګ په موخه راشي.
نوموړي وویل، دی او د وزارت ټول کار کوونکي خپل ځانونه خلکو ته د خدماتو برخه مې مسؤل ګڼي او هڅې یې دا دي چې د خلکو ستونزو ته پر وخت رسېدنه وشي.
ښاغلي وزیر مولوي حمدالله نعماني زیاته کړه؛ ورسپارل شوې دنده امتیاز نه، بلکې مسؤلیت ګڼي او هڅه به کوي چې په سمه توګه یې اداء کړي.
هغه له مراجعینو غوښتنه وکړه چې که څه هم د نوي حکومت په راتګ سره په افغانستان کې د فساد ریشې ختمې شوي، خو که بیا هم په کوم ځای کې یې څرک لېدل کېږي نو د وزارت رهبري ته دې خبر ورکړل شي.
