پېروزي ښارګوټي کې د بېجینګ – ننګرهار شرکت عملاً خپل کار پیل کړ
۱۴۴۳/۱۰/۱۴
بېجینګ – ننګرهار د ساختماني موادو د تولید شرکت د کابل ده سبز کې د پېروزي ښارګوټي په ختیځه څنډه کې عملاً خپلې چارې پیل کړې.
بېجینګ – ننګرهار شرکت هڅه کوي چې د (۱۵۰) تولیدي فابریکو د فعالیت لپاره ډېر ژر زمینه برابره کړي چې اوسمهال یې د رغېدو چارې ګړندۍ روانې کړي دي.
د ښار جوړولو او ځمکو وزارت په رمضان المبارک میاشت کې د ا.ا.ا د کابینې له پرېکړې سره سم د رییس الوزرا اقتصادي مرستیال او د اقتصادي کمېسیون مشر ملا عبدالغني برادر په شتون کې له بېجینګ – ننګرهار شرکت سره یو تړون لیک لاسلیک کړ چې له مخې یې د بېجینګ – ننګرهار شرکت ته د پېروژي پروژې په ختیځه څنډه کې (۶۵۰) جریبه ځمکه د تولیدي فابریکو د جوړولو په موخه ورکړل شوه.
په دغه اندازه ځمکه کې نږدې (۲۱۶) میلیونه امریکایي ډالره پانګونه کېږي چې ورسره به (۱۳۶۰۰) کسانو ته په مستقیمه توګه او (۳۰۰۰۰) کسانو ته په غیر مستقیمه توګه د کار کولو زمینه برابره شي.
