د ښار جوړولو او ځمکو وزارت مالي او اداري مرستیال په افغاني دستګاه کې د دغه وزارت له ریاستونو او دفترونو لیدنه وکړه
۱۴۰۱/۰۱/۰۱
د ښار جوړولو او ځمکو وزارت محترم مالي او اداري مرستیال حافظ محمد امین د کابل ۹ مې ناحیې اړوند سیمه کې په افغاني دستګاه کې د یاد وزارت له یو شمېر ریسانو سره د شته ستونزو د حل په موخه وکتل.
په دغه کتنه کې د ښار جوړولو او ځمکو وزارت اړوند په افغاني دستګاه کې د بېلا بېلو ریاستونو او امریتونو مسؤلینو د خپلو دندو، مسؤلیتونو او فعالیتونو په اړه معلومات ورکړل او د خپلو ځینو ستونزو په اړه یې یادونه وکړه.
مالي او اداري مرستیال ښاغلي حافظ محمد امین وویل، د تېرو جګړو او شخړو له امله د هېواد په بېلا بېلو برخو کې ستونزې او مشکلات رامنځته شوي، چې له نیکه مرغه له تحول وروسته سرتاسري امنیت ښه شوی او د نورو ستونزو د حل لپاره ګام په ګام مخکې تګ روان دی.
د ښار جوړولو او ځمکو وزارت مالي او اداري مرستیال په افغاني دستګاه کې شته دولتي کارکوونکو ته ډاډ ورکړ چې ستونزې به یې د وخت په تېرېدو حل شي او هغوی ته یې د چارو ښه پرمختګ په موخه لازمې لارښوونې وکړې.
دغه راز مالي او اداري مرستیال ښاغلي حافظ محمد امین د پلازمېنې پراختیا زون ادارې چې په بنایي سیمه کې موقعیت لري لیدنه وکړه.
نوموړي د پلازمېنې پراختیا زون ادارې له مسؤلینو او کار کوونکو سره په بېلا بېلو موضوعاتو خبرې وکړې او د لا پرمختګ لپاره یې نظریات تبادله کړل.
