د پېروزي ښارګوټي پروژه د پلې کېدو په حال کې ده.
د ښار جوړونې او ځمکو وزارت سرپرست مولوي حمدالله نعماني او ورسره هيات د سیمې د وضعیت د ارزونې، خنډونو او ستونزو د لیرې کولو او د کار د چټکتیا په موخه له یادې پروژې څخه د کار بهير لیدنه وکړه.
ياد پروژه د کابل ولايت په ده سبز ولسوالۍ کې د کم عايد لرونکو او بې وزلو خلکو لپاره د سرپناه د جوړولو په موخه پلې کېږي.
د ښار جوړونې او ځمکو وزارت سرپرست د پېروزي ښارګوټي پروژه یوه له مهمو انکشافي پروژو وبلله او پر عملي کېدو یې ټینګار وکړ.
نوموړي د لیدنې پر مهال د پروژې مسوولینو ته د کار د چټکتیا او د چارو د لا ښه پرمختګ او سمبالښت په موخه لازمې لارښوونې وکړې.
د پيروزي د استوګنې د پروژې مسوولين هم وايي، چې دا پروژه به مثبتې پايلې ولري، لکه د کاري فرصتونو په رامنځته کولو، په کابل کې د نفوسو د تراکم په راکمولو، د سالم چاپيريال په ښه والي او د کورونو د بيو په کمولو کې به مهم رول ولوبوي.
د پيروزي پروژه په هیواد کې د عامه ګټو یوازینۍ پروژه ده، چې په شپږو جلا پړاوونو وېشل شوې او په دې کې ۹۱۳۰ د استوګنې ځمکې او ۴۴۹ سوداګریز او د استوګنې بلاکونه، تفریحي پارکونه، مذهبي ځایونه، شنې ساحې، صنعتي پارکونه او نور ښاري خدمات شامل دي.
