یو ترکي ساختماني شرکت په کابل جدید ښار ګوټي کې پانګونه کوي
1444/0512
د یو ترکي ساختماني شرکت مسؤلینو د کور او ښار جوړولو وزارت د محترم سرپرست وزیر شیخ حمدالله نعماني سره د لیدو په مهال د کابل ښار د 19 مې ناحیې اړوند په پیروزي ښارګوټي کې د پانگونې په اړه خپل چمتوالی وښود.
یاد ساختماني شرکت په ترکیې هېواد کې د کور او ودانیو برخه کې کار کړی چې اوس غواړي د خپلو تجربو څخه په ګټې اخستنې افغانستان کې د کور او ودانیو د پراختیا په برخه کې کار وکړي.
د یاد شرکت مسؤلینو د کور او ښار جوړولو وزارت د محترم سرپرست وزیر سره په لیدنه کې یادونه وکړه چې د سیمې د مشخص کیدو وروسته به دوی خپل عملي کارونه پیل کړي.
د دغې لیدنې په مهال د نوموړي شرکت مسؤلینو وویل: لومړی د دارالایتام کمپلکس چارې پیلوي چې مسجد شریف، د مسلکي زده کړو ځانګړی ځای، تدریسي تعمیر، لیلیه، روغتیایي کلینیک، د لوبو پارک او د ماشومانو لپاره نورې اسانتیاوې به په کې موحودې وي.
د کابل جدید ښارګوټي ریس محترم اقبال میرزاده د دې ښارګوټي په اړه د ترکي شرکتونو مسؤلینو ته بشپړ معلومات ورکړل، چې د دې ښارګوټي د لومړي فاز ټول کارونه بشپړ شوي او د هر ډول پانگونې لپاره چمتو دی.
د کور او ښار جوړولو وزارت محترم سرپرست وزیر وویل: یاد وزارت دوی ته د پانگونې زمینه برابروي او د نورو وزارتونو سره به د ترکي شرکتونو په اړه هم خبرې وکړي، تر څو یې اړوندې چارې په چټکۍ پرمختګ وکړي او د پانګونې زمینه ورته برابره کړي.نوموړي وویل: لومړی به په یوه هوکړه لیک کار وکړي چې د دواړو اړخونو مسؤلیتونه به پکې روښانه شي چې تر لاسلیک وروسته به هر لوری خپل مسؤلیت سرته ورسوي.
