کونړ کې د مهاجرینو د ښارګوټي د جوړولو چارې رسماً پیل شوې
۱۴۴۷/۰۲/۲۰
کونړ ولایت کې د کور او ښار جوړولو ریاست محترم رئیس مولوي نبي الله طلحه وایي، د خاص کونړ ولسوالۍ اړوند د مهاجرینو د ښارګوټي د جوړېدو چارې په رسمي ډول پیل شوې.
دغه پروژې ته د عملي کار د پیلېدو په مناسبت ځانګړې غونډه جوړه شوې وه چې په کې د دغه ولایت محترم والي مولوي قدرت الله ابو حمزه ، د کور او ښار جوړولو ریاست محترم رئیس، مولوي نبي الله طلحه، او د کونړ ولایت اړوند نورو ریاستونو محترمو رئیسانو او مسؤلینو د اړوندو تخنیکي ټیمونو غړي، سیمه ییز مشران او د کډوالو استازو برخه اخیستې وه.
مولوي نبي الله طلحه وویل، دغه ښارګوټی به د ۳۷۴ جریبه دولتي ځمکې په مساحت کې جوړ شي، چې په کې ټولټال ۳۸۲ استوګنیزې نمرې په منظمه نقشه وېشل شوې دي.
نوموړی وایي، د ښارګوټي د معیاري کولو لپاره به عمومي او فرعي سړکونه د ۱۲.۵ مترو په عرض سره هموار شي، څو اوسېدونکو ته د تګ راتګ اسانتیاوې برابرې شي.
د پروژې په لومړنیو خدماتو کې د څاهګانو کیندل، د څښاک پاکو اوبو سیستم جوړول، او د فاضله اوبو د مدیریت لپاره بنسټیز اقدامات شامل دي.
کونړ ولایت کې د کور او ښار جوړولو رئیس ښاغلی مولوي نبی الله طلحه زیاتوي، د دغه ټولګټو چارو په ترسره کولو برخه کې به درې میلیونه افغانۍ لګښت وشي، چې د ښارګوټي اوسېدونکو لپاره د تلپاتې اسانتیاوو زمینه برابروي.
دغه پروژه د کور او ښار جوړولو وزارت د هغو ملي پروګرامونو له ډلې ده، چې موخه یې د بېځایه شوو کورنیو لپاره دایمي استوګنځایونه جوړول، د ژوند د معیار لوړول، او د هېواد د ښاري پراختیا د چټکتیا لپاره اساسي ګامونه اخیستل دي.
