کندهار ولایت کې د یوې خپل سرې رغنیزې چارې مخنیوی وشو
۱۴۴۵/۰۷/۱۶
کندهار ولایت کې د کور او ښار جوړولو محترم رئیس مولوي عبدالمتین عاشق وایي، د ریاست اړوند تخنیکي او مسلکي ټیم یې د دغه ولایت د ښار په دننه کې د یوې خپل سرې رغنیزې چارې مخنیوی وکړ.
مولوي عبدالمتین عاشق وایي، یو شمېر کسانو غوښتل چې د کندهار ښار په (۲) مې او (۶) مې ناحیې د سړک په حریم کې بې بنسټه او په خپل سرې توګه رغونه وکړي، چې دوی یې مخنیوی وکړ.
نوموړی وایي، کندهار ولایت کې د کور او ښار جوړولو ریاست اړوند مسؤلین او انجنیران وخت په وخت له سیمو څارنه کوي او د خپل سرو رغنیزو چارو مخنیوی کوي.
دوی وایي، هېچا ته به اجازه ورنه کړي، چې د پلان خلاف په خپل سرې توګه رغنیزې چارې پلي کړي.
د کور او ښار جوړولو وزارت، له ټولو هېوادوالو غواړي، چې په خپلو ولایتونو او سیمو کې دې له خپل سرو رغنیزو چارو ډډه وکړي، چې دغه چاره په راتلونکي کې هم دوی او هم نورو خلکو او حکومت ته سرخوږی جوړوي.
