کندز ولایت کې د ښاري سرغړونو مخنیوي په موخه د ښار له بېلا بېلو ناحیو څارنه وشوه
۱۴۴۷/۰۱/۰۲
د کور او ښار جوړولو وزارت، له ښاري سرغړونو د مخنیوي ریاست محترم رئیس مولوي عبدالمنان حقاني وایي، اړوند مسلکي او تخنیکي ټیم یې د کندز ښار بېلابېلو ناحیو څخه څارنه وکړه.
ښاغلی مولوي حقاني وایي، د ښاري تخلفاتو د څار او مخنیوي ټیم د کندز ښار له څو ناحیو څخه لیدنه وکړه، څو د استوګنیزو او سوداګریزو سیمو د تفکیک، د سړکونو د حریم رعایت او د سرغړونو مخنیوي په موخه ارزونه ترسره کړي.
نوموړی وایي، د څار په لړ کې معلومه شوه، چې یو شمېر ودانۍ له تصویب شوو پلانونو پرته، په خپل سري ډول جوړېږي.
ښاغلي مولوي عبدالمنان حقاني زیاته کړه، د ښاري سرغړونو د څار او مخنیوي ټیم یې ژر تر ژره یادې چارې ځنډولي او د ودانیو خاوندانو ته یې سپارښتنه وکړه، څو د قانوني پلانونو مطابق خپلې چارې تنظیم او پرمخ یوسي.
د کور او ښار جوړولو وزارت، هېچا ته اجازه نه ورکوي، چې د ښار جوړولو له رسمي پلانونو او اصولو څخه سرغړونه وکړي.
د کور او ښار جوړولو وزارت له ټولو هېوادوالو غواړي، چې له دغه وزارت سره بشپړه همکاري وکړي او د ښاري پراختیا او مسکن برخو کې له خپلسریو ډډه وکړي.
