کابل کې د یو معیاري طبي کمپلېکس جوړولو لپاره د ځمکې په تشخیص خبرې وشوې
۱۴۴۵/۷/۱۳
د کور او ښار جوړولو وزارت د محترم سرپرست وزیر شیخ حمدالله نعماني په مشرۍ ، د عامې روغتیا محترم وزارت، کابل محترمې ښاروالۍ او د کرنې محترم وزارت د اراضۍ استازو؛ په کابل کې د یو معیاري طبي کمپلېکس جوړولو لپاره د ځمکې د تشخیص په لارو چارو خبرې وکړې.
دغه ناسته، د ا.ا.ا د محترمې کابینې د روان کال د (۱۰) ګڼې ناستې د پرېکړې د تطبیق په موخه ترسره شوه، چې په کې د ځمکې د تشخیص لپاره په اړینو موضوعاتو خبرې وشوې.
د عامې روغتیا وزارت استازي وویل، وزارت یې غواړي داسې ځای کې ستر معیاري طبي کمپلېکس و رغوي چې له ښاري ګڼې ګوڼې لیرې او د خلکو لاسرسی ورته اسان وي.
د کور او ښار جوړولو وزارت محترم سرپرست وزیر شیخ حمدالله نعماني، له عامې روغتیا وزارت غوښتنه وکړه، تر څو خپله غوښتنه له معیارونو او مشخصاتو سره سم په لیکلې بڼه کمېټې ته را واستوي، چې کمېټه به بیا د غوښتنې مشخصاتو او معیارونو ته په کتو د ځمکې په تشخیص او غوراوي کار وکړي.
په ناسته کې، د عامې روغتیا وزارت استازي ژمنه وکړه، چې د راتلونکې اونۍ تر یکشنبې ورځې به خپله غوښتنه او معیارونه په لیکلې بڼه له کمېټې سره شریکوي، چې له هغې وروسته به کمېټه په ګډه د یوې مناسبې ځمکې په لټه کې کېږي.
