ښار جوړولو او ځمکو وزارت پانګوالو ته د پانګونې په ځمکه ورکوي
۱۴۴۳/۱۰/۲۶
د ښار جوړولو او ځمکو وزارت محترم سرپرست مولوي حمدالله نعماني د چینا ټاون سوداګریز ښارګوټي لخوا په رامنځته شوي نندارتون مراسمو کې وویل، د سوداګریزو او صنعتي نندارتونونو برابرول د صنعت او پانګونې د ودې لپاره یو مهم ګام دی.
محترم مولوي حمدالله نعماني وویل، د چین هېواد لخوا په افغانستان کې پانګونه د دواړو هېوادونو ترمنځ د ښو اړیکو، ښه ګاونډیتوب او ښې همکارۍ په معنا دي چې کولی شي د دواړو هېوادونو د وګړو ترمنځ حسنه روابط لا ټینګ کړي.
ښاغلي وزیر زیاته کړه، دوی په افغانستان کې د چین هېواد له پانګونې او پانګوالو ملاتړ کوي او هڅه کوي چې بېلا بېلې اسانتیاوې ورته رامنځته کړي.
نوموړي زیاته کړه، د ښار جوړولو او ځمکو وزارت د پلان مطابق په کافي اندازه ځمکه د صنعت کارانو او پانګوالو په خدمت کې ورکوي چې څنګه وکولی شي هم له ځمکې سالمه ګټه پورته شي او هم پانګوال ګټه واخلي.
هغه وویل، د روژې په مبارکه میاشت کې یې هم په کافي اندازه ځمکه چینایي پانګوالو ته په واک کې ورکړه چې وکولی شي تولیدي فابریکې جوړې کړي چې د نورو ګټو ترڅنګ به یې خلکو ته د کار کولو زمینه برابره شي.
ښاغلي سرپرست د خپلو خبرو په دوام وویل، له بېلا بېلو پانګوالو او صنعتکارانو سره یې د ځمکو د وېش برخه کې تفاهم لیکونه لاسلیک کړي چې د ځینو یې عملي چارې روانې دي چې په وینا یې افغانستان خپلو خلکو ته اړتیا لري او باید خپله افغان ولس لاس په کار شي او د خپل هېواد د پرمختګ لپاره نه ستړې کېدونکې هلې ځلې وکړي.
چینا ټاون چې دمګړۍ د کابل په تایمني سیمه کې فعالیت لري، ډېر ژر به یې شاوخوا (۱۵۰) لویې او وړې فابریکې د کابل په ده سبز ختیځه برخه کې هم فعالیت پیل کړي چې د افغانستان بازار ته په کتو به بېلا بېل توکي تولیدوي او ټولو ولایتونو ته به انتقالېږي.
