ښار جوړولو او ځمکو وزارت داسې پانګونې ته زمینه برابروي چې عواید لوړ او خلک زیانمن نه شي
۱۴۴۳/۰۹/۰۲
د ښار جوړولو او ځمکو وزارت سرپرست محترم مولوي حمد الله نعماني په خپل کاري دفتر کې له ځینو ولایتونو راغلو کسانو سره وکتل او پر بېلا بېلو موضوعاتو یې خبرې وکړې.
په دغه کسانو کې له کندز راغلو پانګوالو یادونه وکړه چې غواړي د کندز ولایت په مرکز کې یوه په نوي ډیزاین او له ماسټر پلان سره سم زېرزمینې او په کې ۱۴۵۰ هټۍ جوړې کړي چې لفتونه او بېلا بېلې ښځینه او نارینه زینې به هم ولري او امارت ته به یې عواید هم ورشي.
د ښار جوړولو او ځمکو وزارت محترم سرپرست مولوي حمد الله نعماني راغلو کسانو ته په خطاب کې وویل، چې غواړي داسې متوازنې پراختیا او پانګونې ته زمینه برابره کړي چې ملي عواید زیات او خلکو ته د کار زمینې د برابرولو ترڅنګ هغوی زیانمن نه شي.
ښاغلي مولوي حمد الله نعماني هغه لارو چارو او تګلارو ته اشاره وکړه چې څنګه کېدای شي له مخې یې پانګوال او امارت خپلو موخو ته ورسېږي او یو باثباته اقتصادي افغانستان رامنځته شي.
