چمتو یو چې د مسکن په برخه کې سل میلیون ډالر پانګونه وکړو
۹/۱۱/۱۴۴۶
د کور او ښار جوړولو وزارت د مسکن، ودانیزو چارو او د برنامو پراختیا مرستیال محترم الحاج محمد اسماعیل فائز، په خپل کاري دفتر کې له چینایي پانګوالو سره ولیدل.
په دې غونډه کې، چې د اړوندو ریاستونو مسؤلینو هم پکې ګډون درلود، چینایي پانګه وال لینبو چو وویل، موږ له څه مودې راهیسې په افغانستان کې یو او غواړو چې په دې هېواد کې د مسکن په برخه کې پانګونه وکړو.
نوموړي زیاته کړه، موږ هیله لرو چې د کور او ښار جوړولو وزارت مسؤلین به پدې برخه کې له موږ سره همکاري وکړي، که چیرې د کورونو جوړولو لپاره ځمکه وپیژندل شي، موږ چمتو یو چې (۱۰۰) سل میلیونه امریکايي ډالر پانګونه وکړو.
ورپسې، د مسکن، ودانیزو چارو او د برنامو پراختیا مرستیال فائز، د هغوی د ښه راغلاست په ترڅ کې وویل، افغانستان په مختلفو برخو کې بهرنۍ او کورنۍ پانګونې ته اړتیا لري، او زموږ اړتیا د مسکن په برخه کې تر ټولو زیاته د پام وړ ده، او پدې برخه کې، موږ به ستاسو لپاره هر ډول همکارۍ ته اسانتیاوې برابرې کړو.
په پای کې، موافقه وشوه چې په راتلونکې غونډه کې به په دې موضوع په تفصیل سره بحث وشي.
