پېروزي استوکنیزه پروژه کې د یو دارالایتام جوړولو د بنسټ ډبره کېښودل شوه
۱۴۴۴/۰۵/۱۶
د کور او ښار جوړولو وزارت د کابل په (۱۹) ناحیه ده سبز سیمه کې د یو دارالایتام جوړولو په موخه لس جریبه ځمکه ځانګړې کړه، چې پر جوړولو یې کار پیل او د بنسټ ډبره یې کېښودل شوه.
په دغه لس جریبه ځمکه کې به د (۹۶) نارینه او (۹۶) ښځینه یتمیانو د ښوونې او روزنې، مسلکي زده کړو، تفریحي ځایونو او مسجد په موخه جلا جلا ځایونه جوړېږي.
دغه دارالایتام د (بشائر) خیریه بنسټ له خوا د یو ترکي (یتیم لر) بنسټ په مالي مرسته جوړېږي، چې افغان یتیمانو ته به زده کړې ورکوي.
د کور او ښار جوړولو وزارت محترم سرپرست وزیر شیخ حمدالله نعماني د یاد دارالایتام د بنسټ ډبرې اېښودو په مهال له اړوندو مسؤلینو وغوښتل چې رغنیزې چارې دې ژر پیل کړي او دوی به یې په نورو برخو کې د همکارۍ ملا وروتړي.
د پېروزي استوګنیز ښارګوټي کې ورځ بلې ته رغنیزې چارې پراختیا مومي او پانګوال هڅه کوي چې په یاد ښارګوټي او کابل جدید ښار چې پېروزي یې یوه برخه ده، پانګونه وکړي.د کور او ښار جوړولو وزارت له ټولو پانګوالو غواړي چې راشي او په کابل جدید ښار کې پانګونه وکړي.
