پکتیکا ولایت کې د غیر پلاني ودانیو له جوړېدو مخنیوی وشو
۱۴۴۶/۰۶/۲۱
د کور او ښار جوړولو وزارت د ښاري تخلفاتو مخنیوي ریاست محترم رئیس مولوي عبدالمنان حقاني وایي، د ریاست اړوند تخنیکي ټیم یې پکتیکا ولایت کې د مامورینو په نوم ښارګوټي کې د خپلسرو او غیر قانوني ودانیو له جوړېدو مخنیوی وکړ.
ښاغلی مولوي حقاني وایي، انجنیرانو یې د پکتیکا په مرکز ښرنه کې، د مامورینو په ښارګوتي کې د تفصیلي پلان خلاف د خپلسرو اطاقونو له جوړولو مخنیوی کړی دی.
نوموړی وایي، یادې چارې د پکتیکا ولایت د ښاروالۍ او د کور او ښار جوړولو ریاست له اجازې پرته پيل شوې وې، چې په وخت یې مخنیوی وشو.
د یاد ښارګوتي په تفصیلي پلان کې، ذکر شوې ساحه د دوه پوړیزو سوداګریزو مارکېټونو لپاره په پام کې نیول شوې، خو په ساحه کې د بلوکو څخه جوړ شوي غیر معیاري یو پوړیزه اطاقونه جوړېدل، چې د کور او ښار جوړولو ریاست او د یاد ولایت د ښاروالۍ ریاست په همکارۍ یې چارې بندې او ړنګې شوې.
د کور او ښار جوړولو وزارت له ټولو هېوادوالو غواړي چې له خپلسرو کړنو لاس واخلي، خپلې پانګې دې په خطر کې نه اچوي او هڅه دې وکړي چې منظمه ښاري وده او پراختیا رامنځته کړي.
