په کندهار کې راستنېدونکو مهاجرینو ته د ځمکو د وېش لړۍ پیل شوه
۱۴۴۷/۰۸/۰۳
د کندهار ولایت د کور او ښار جوړولو ریاست د لا ډېرې روڼتیا او عدالت د تامین په موخه راستنېدونکو مهاجرینو ته د استوګنې ځمکو د وېش لړۍ د پچه اچونې (قرعې) له لارې پيل کړه.
د یاد ریاست مسؤلین وايي، تر اوسه په ټولیز ډول زرګونو مستحقو کډوالو کورنیو ته د استوګنې ځمکې ځانګړې او وېشل شوې دي، د معلوماتو له مخې، د کندهار د ژړۍ ولسوالۍ په نوي کډوال ښارګوټي کې یوازې زرګونو راستنېدونکو مهاجرینو ته ځمکې وېشل شوې دي.
د کندهار د کور او ښار جوړولو ریاست ټینګار کوي چې د ځمکو د وېش بهیر د اصولو، شفافیت او عدالت پر بنسټ روان دی، تر څو ټول مستحق کډوال وکولای شي په منظم او قانوني ډول دایمي استوګنځای ترلاسه کړي.
د کندهار ولایت د کور او ښار جوړولو ریاست د کورنیو راستنېدونکو مهاجرینو د دایمي مېشت کېدو او د ښاري پراختیا د منظم بهیر د پیاوړتیا په موخه د کډوالو ښارګوټي طرحه او پلي کوي. د ځمکو د وېش د پچه اچونې بهیر د شفافیت د زیاتولو، د هر ډول شک او تبعیض د مخنیوي او د مستحقو کورنیو د حقونو د خوندي کولو لپاره غوره شوی، تر څو کډوال وکولای شي په باوري فضا کې خپل نوی ژوند پيل کړي.
