په کابل کې د پېروزي ښارګوټي پروژې د اوبو ستونزه او برښنا ستونزه حل شوه
۱۴۴۳/۰۹/۰۸
د ښار جوړولو او ځمکو وزارت محترم مالي او اداري مرستیال حافظ محمد امین فاروقي د پېروزي ښارګوټي له پروژې لیدنه وکړه .
ښاغلي حافظ محمد امین فاروقي د سیمې د وضعیت ارزونه وکړه ، ستونزې او خنډونو یې په ګوته کړل او یادونه یې وکړه چې هڅې به وکړي د پېروژي ښارګوټي د فعالیت چارې لا ګړندۍ کړي.
دمګړۍ په پېروزي ښارګوټي کې د اوبو څلور ژورې څاه ګانې اېستل شوي چې هره یوه یې په یوه ثانیه کې تر شاوخوا ۱۲ لیتره اوبه ورکوي او د معلوماتو پر بنسټ کولی شي په پېروزي ښارګوټي کې د اوسېدونکو اړتیا پوره کړي.
دغه راز د برښنا پایو د تولید او تمدید کارونه هم په چټکې روان دي او پر دې سربېره د ښارګوټي د زرغونتیا په موخه یو میلیون مېوه لرونکي او تزئیناتي نیالګي چمتو دي.
ياد پروژه د کابل ولايت په ده سبز ولسوالۍ کې د کم عايد لرونکو او بې وزلو خلکو لپاره د سرپناه برابرولو په موخه جوړه شوې چې ډېر ژر به ګټې اخیستنې ته وسپارل شي.
د ښار جوړولو او ځمکو وزارت مالي او اداري مرستیال د پېروزي ښارګوټي پروژه یوه له مهمو انکشافي پروژو یاده کړه او پر ژر عملي کېدو یې ټینګار وکړ.
نوموړي د لیدنې پر مهال د پروژې مسوولینو ته د کار د چټکتیا او د چارو د لا ښه پرمختګ او سمبالښت په موخه لازمې لارښوونې وکړې.
د پيروزي د استوګنې د پروژې مسوولين هم وايي، چې دا پروژه به مثبتې پايلې ولري، چې بې سرپناه خلکو ته به سرپناه برابره شي، د اوسني کابل د نفوسو تراکم او ترافیکي ګڼه ګوڼه به کمه شي ، خلکو ته به کاري فرصتونه برابر شي، د سالم چاپيريال په رامنځته کولو او د کورونو د بيو په کمولو کې به مهم رول ولوبوي.
د پيروزي پروژه په هېواد کې د عامه ګټو له پروژو یو ه ده چې په شپږو جلا جلا پړاوونو وېشل شوې او په دې کې ۹۱۳۰ د استوګنې ځمکې او ۴۴۹ سوداګریز او د استوګنې بلاکونه، تفریحي پارکونه، مذهبي ځایونه، شنې ساحې، صنعتي پارکونه او نور ښاري خدمات شامل دي.
