په کابل ښار کې د غیرقانوني ودانیزو فعالیتونو د مخنیوي په موخه جدي څارنه ترسره شوه
۱۴۴۷/۰۷/۲۳
د کور او ښار جوړولو وزارت د ښاري سرغړونو د مخنیوي د عمومي ریاست د لارښوونو له مخې، د ښاري سرغړونو د مخنیوي او د پروژو د تطبیق د څارنې ریاست اړوند تخنیکي ټیمونو د وزارت د محترم مقام د حکم پر بنسټ، د کابل ښار د پنځمې ناحیې اړوند د سرې میاشتې ښارګوټي له ودانیزو چارو څارنه وکړه.
د یادونې وړ ده چې د دې ریاست تخنیکي ټیم تر دې وړاندې هم له یادې سیمې څخه لیدنه کړې وه او هغه ودانیزې پروژې چې له اصولو سره په ټکر کې وې، مهر او لاک شوې وې؛ خو د وروستۍ څارنې پر مهال ولیدل شول چې د ځینو ودانیو مالکینو، یو ځل بیا خپلې ودانیزې چارې پیل کړې دي.
د نننۍ څارنې په ترڅ کې، د ښاري سرغړونو د مخنیوي ریاست د محترم رئیس په لارښوونه، یادو مالکینو ته هدایت ورکړل شو چې د وزارت تر وروستۍ پریکړې پورې خپلې رغنیزې چارې سمدستي ودروي. همدارنګه، هغوی ته لازمې سپارښتنې او پوهاوی هم وړاندې شو.
د وزارت د مقام د هدایت د تطبیق او د غیرمجازو فعالیتونو د مخنیوي په موخه، یادې پروژې یو ځل بیا په بشپړ ډول مهر او لاک شوې او تر بل امر پورې د هر ډول ودانیزوچارو دوام منع اعلان شو.
د ښاري سرغړونو د مخنیوي ریاست د وزارت د احکامو پر دقیق تطبیق، د ښاري نظم پر ټینګښت او په کابل ښار کې د دوامدارې او جدي څارنې پر دوام ټینګار کوي.
